watermoon

話說，上上個禮拜我咳到得返半條人命，食完西藥食中藥，人家藥材鋪明明有中醫坐鎮，我偏要叫太子女執藥。第二日，又想叫小姐幫我，好明顯佢媾緊仔唔得閒理我，話見到門口有架Benz跑，我話，嘩成百萬啊，她說，點止呀，幾百萬呀。唔知由幾時開始，東大街的小商人就有錢成咁，目中看得到的跑車都要幾百萬，唔知係咪話俾條仔知，我眼覺幾高架。Anyway，佢話我病程匪淺，於是叫世伯出馬。世伯看來都很年輕，我好似街市阿姐逢人叫靚女咁，話佢好後生。我說5點回來飲藥。後來那天有點忙，就遲了一點，想不到這樣，就給自己和鋪頭伙記設了一道難題。 伙記見只有一杯中藥，旁邊留下字條一張「靚女」。我不能承認我是靚女，而伙記又實在無法憑空確認，唯有打電話給老闆。他不好意思的說：都係問清楚者。 絕對喜歡離題的我，馬上想到希臘羅馬神話中的金蘋果：「獻給最美的」，就是這個蘋果，引發特洛伊戰爭。敗家仔王子，不愛江山愛美人，攪到死傷枕藉生靈塗炭，都只是為了一個美女，我細個睇果時想，其實，Helen靚Ｄ定愛神靚Ｄ呢？如果愛神真係咁靚，點解佢唔媾愛神呢？我是知道，Helen一定靚過愛神的，愛神只是一個有能力操控愛情的女人，她不是最美的，我是這樣想的。 我本來，真的很想講這個故事給那兩個伙記聽，不過，我控制自己：人地都係賣藥者，佢地係無辜架，無必要聽我講呢種野。他們拿著最新的Samsung手機研究新功能，試問，我又點忍心，要兩個這樣純真的年輕人，聽埋呢Ｄ咁麻煩既故仔呢？於是，我飲完已經涼掉的中藥離去，回家洗了一個很熱很熱的熱水涼，摟著被，第二天果然就好多了。